Qozog‘iston JSTga kirish bo‘yicha qariyb 20 yil davom etgan muzokaralarni yakunladi

Qozog‘iston Jahon savdo tashkiloti (JST)ga kirish bo‘yicha qariyb 20 yil davom etgan muzokaralarni yakunladi. Bu haqda Time.kz xabar bermoqda.

Tashkilot bosh kotibi Roberto Azevedu JSTga a’zo mamlakatlar va Qozog‘iston hukumatini “ushbu tarixiy qadam” bilan tabrikladi. “Qozog‘istonni JST tarkibida olqishlaydigan kunimni orziqib kutyapman”, - dedi u.

JST matbuot xizmati xabariga ko‘ra, 22-iyun kuni tashkilotga qo‘shilish bo‘yicha hujjatlar to‘plami rasmiy ma’qullashi uchun ishchi guruhga taqdim etiladi, shundan so‘ng tasdiqlash uchun tashkilot bosh kengashi va JSTning amaldagi 161 a’zosi e’tiboriga havola qilinadi.

Eslatib o‘tamiz, Qozog‘iston JSTga qo‘shilish bo‘yicha 1996-yil 29-yanvar kuni ariza bergan.

JST – jahon savdo sohasida nazorat qilish vazifalarini amalga oshiruvchi yagona xalqaro tashkilotdir. Tashkilotning asosiy maqsadi savdo sohasini yanada liberallashtirish va maqbul raqobat sharoitlarini ta’minlashdan iborat.