Жанубий Корея Марказий банки 11 май куни қайта молиялаш ставкаси (ҚМС)ни 1,75 фоиздан 1,5 фоизгача камайтирди – бу рекорд даражадаги паст кўрсаткичдир. Vedomosti.ru’нинг хабар беришича, регулятор 2014 йил августидан бери ҚМСни тўртинчи марта, сўнгги уч йилликда эса еттинчи марта пасайтирмоқда.
Марказий банкнинг огоҳлантиришича, мамлакатда тарқалган Яқин Шарқ респиратор синдроми коронавируси (MERS) истеъмол талабига таҳдид солмоқда. Банк MERS’ни «иқтисодий прогноздаги энг кенг кўламли ўзгарувчи» деб атади.
Жанубий Корея ҳукумати маълумотларига кўра, 2015 йил май ойида мамлакат экспорти ҳажми 10,9 фоизга қисқарган эди. Бу 2009 йил августидан бери қайд этилган энг паст кўрсаткичдир – ўшанда глобал молиявий инқироз сабаб кўрсаткич 20 фоизга қисқарганди.
Май ойидаги тушкунликка Хитой иқтисодиёти ўсишининг секинлашуви, жаҳон бўйлаб нефть нархининг арзонлашуви ва май ойидаги иш кунлари сони камлиги сабаб қилиб кўрсатилганди. Марказий банк баёнотига кўра, айни дамда экспорт кўрсаткичларининг тушиши тезлашган, MERS эпидемияси сабаб ички истеъмол кўрсаткичлари ҳам пасайишни бошлаган.
Марказий банк раиси Ли Чжуёлнинг сўзларига кўра, касаллик тарқалиши сабаб Жанубий Корея ялпи ички маҳсулоти бўйича 2015 йил прогнозлари пасайтирилиши мумкин. Амалдаги прогноз бўйича ЯИМ ҳажми йил давомида 3,1 фоизга ўсиши керак, янги прогноз кўрсаткичлари июль ойида эълон қилинади.
Жанубий Кореяда MERS юқиши билан боғлиқ илк ҳолат 20 май куни қайд этилганди. Ҳозиргача касаллик 122 кишига юққан, 3,8 минг киши карантинга олинган, тўққиз бемор вафот этган.
Изоҳ (0)