Bolalar orziqib kutgan yozgi ta’til kunlari ham boshlandi. Mavsumda O‘zbekistonning so‘lim maskanlarida joylashgan sog‘lomlashtirish oromgohlari, shuningdek, maktablar va boshqa o‘quv muassasalari qoshida tashkil etilgan kunduzgi oromgohlar o‘g‘il-qizlar ixtiyorida bo‘ladi, deb xabar beradi “O‘zA”.
Toshkent shahar xalq ta’limi boshqarmasidan ma’lum qilishlaricha, joriy yil yoz mavsumida faoliyat ko‘rsatadigan poytaxtdagi 36 ta kunduzgi bolalar oromgohida 7—13 yoshli 16 mingdan ziyod o‘g‘il-qiz dam oladi. Kunduzgi bolalar oromgohlari tashkil etiladigan maktablar sanitariya-gigiyena talablariga javob berishi, ularning moddiy-texnik bazasi va yong‘in xavfsizligi ta’minlangani hisobga olingan holda tanlab olindi. Bu maktablarning yuvinish xonalari va oshxonasida issiq ovqat bilan ta’minlash imkoniyatlari ham e’tiborga olindi.
Bolalarning ta’tilni mazmunli o‘tkazishi uchun tadbirlar rejasi ishlab chiqildi. Unda muzeylar, istirohat bog‘lari, sport obyektlariga sayohat uyushtirish ko‘zda tutilgan. Shuningdek, tanlovlar va sport marafonlari dasturi ham tayyorlandi. Bolalar ko‘p vaqtini ashula aytish, rasm chizish, raqs, to‘qish, dizayn, voleybol, basketbol, stol tennisi to‘garaklarida o‘tkazadi.
“Kamolot” yoshlar ijtimoiy harakati eskursiyalar tashkil etish va to‘garaklarning samarali faoliyat ko‘rsatishiga ko‘maklashadi, Bolalar sportini rivojlantirish jamg‘armasi esa zarur sport inventarlarini taqdim etgan. Oromgohda malakali shifokor va tibbiyot hamshiralari bolalar salomatligini nazorat qilib boradi.
Mavsum davomida oromgohda turli madaniy-ma’rifiy tadbirlar, adabiy kechalar, sport musobaqalari o‘tkazish ko‘zda tutilgan. Respublika yosh tomoshabinlar teatri va Respublika qo‘g‘irchoq teatri ijodiy jamoalarining qiziqarli spektakl va dasturlari ularga unutilmas quvonch bag‘ishlaydi.
Yaqin kunlarda ushbu oromgohlar o‘z faoliyatini boshlaydi.
Izoh (0)