2015-yil 3-iyun kuni O‘zbekiston Milliy kutubxonasining “Tafakkur” o‘qish zalida zamonaviy rus tili asoschisi, buyuk rus shoiri, dramaturg va nosir Aleksandr Sergeevich Pushkin tavalludiga bag‘ishlangan “Qalbning ajib shiddati” deb nomlangan kitob-rasmli ko‘rgazma ochildi. Bu haqda Alisher Navoiy nomidagi O‘zbekiston Milliy kutubxonasi sayti xabar bermoqda.
Ko‘rgazmada buyuk shoirning bolalik, o‘smirlik va yoshlik davridan, o‘qish va surgun yillaridan, uning o‘limi tarixi va avlodlari haqida hikoya qiluvchi kitoblar namoyish etilgan. Bu yerda Pushkinning hayoti, ijodi va falsafiy fikrlashini o‘rganishga bag‘ishlangan ilmiy izlanishlar, uning asarlari sharhi ko‘rgazmada alohida o‘rin tutadi.
Shuningdek, mazkur ko‘rgazmada foydalanuvchilar e’tiboriga Pushkinning tanlangan asarlari, poemalari, hikoyalari, balladalari, xatlari, izohlari, dono hikmatlari, aforizmlari hamda uning o‘z matnlariga chizgan “Pushkin qo‘li bilan” rasmlari jamlanmasi havola etilgan. Pushkinning jahon adabiyoti va madaniyatiga qo‘shgan hissasi beqiyosdir. Uning 16 banddan iborat to‘liq asarlar to‘plami hozirgi kunda eng tugal majmuasi hisoblanadi.
Kutubxona foydalanuvchilari ko‘rgazmada mazkur 16 bandli majmua va Pushkinning “Yevgeniy Onegin”, “Pikovaya dama”, “Boris Godunov”, “Kapitan qizi” asarlari bilan tanishadi. Kichik kitobxonlarni esa Pushkinning yorqin rasmlar bilan boyitilgan “Pop va uning xizmatkori Balda haqida ertak”, “Shoh Sulton haqida ertak”, “Baliqchi va baliq haqida ertak”, “Oltin xo‘rozcha haqida ertak” kabi ertak kitoblari befarq qoldirmaydi.
Ko‘rgazmaga tashrif buyurgan foydalanuvchilar O‘zbekiston Milliy kutubxonasi kitob fondida mavjud Pushkinning hayoti va ijodiga dahldor adabiyotlar bilan tanishadi.
Izoh (0)