Jizzaxlik erkak 6500 AQSh dollarini Toshkentga qanday jo‘natish mumkinligi haqida maslahat so‘rab, qo‘shnisining uyiga chiqdi, deb xabar beradi “Huquq” gazetasi.
Qo‘shnisi Jizzax—Toshkent yo‘nalishidagi taksichilar pulni olib borib berishini aytdi va 6500 AQSh dollarini qabul qilib oldi. Uning o‘zi ertasiga avtoshohbekatga borib, “Toshkentga 6500 dollar pochta bor, kim olib boradi?”, dedi. Shu yo‘nalishda qatnaydigan haydovchilardan biri pulning qiymatini eshitib, uni qo‘ldan chiqargisi kelmadi.
— Xizmat haqini bering, o‘zim olib borib beraman, — dedi.
Unga ishongan qo‘shni pochtani va qabul qiluvchining telefon raqamini berdi. Yo‘lovchilarni manzilga yetkazgan haydovchi pulni bermasdan iziga qaytdi.
Jizzaxga kelib pochtani yo‘qotib qo‘yganligini, egasiga yetkazib berolmaganligini aytdi. Oqibatda jabrlanuvchilar tegishli joyga ariza bilan murojaat qildi.
Sud hukmi bilan haydovchiga 2 yil-u 3 oy muddatga axloq tuzatish jazosi tayinlandi. Shuningdek, jabrlanuvchiga yetkazilgan zarar undiriladigan bo‘ldi.
Izoh (0)