Болалар орзиқиб кутган ёзги таътил кунлари ҳам бошланди. Мавсумда Ўзбекистоннинг сўлим масканларида жойлашган соғломлаштириш оромгоҳлари, шунингдек, мактаблар ва бошқа ўқув муассасалари қошида ташкил этилган кундузги оромгоҳлар ўғил-қизлар ихтиёрида бўлади, деб хабар беради «ЎзА».
Тошкент шаҳар халқ таълими бошқармасидан маълум қилишларича, жорий йил ёз мавсумида фаолият кўрсатадиган пойтахтдаги 36 та кундузги болалар оромгоҳида 7—13 ёшли 16 мингдан зиёд ўғил-қиз дам олади. Кундузги болалар оромгоҳлари ташкил этиладиган мактаблар санитария-гигиена талабларига жавоб бериши, уларнинг моддий-техник базаси ва ёнғин хавфсизлиги таъминлангани ҳисобга олинган ҳолда танлаб олинди. Бу мактабларнинг ювиниш хоналари ва ошхонасида иссиқ овқат билан таъминлаш имкониятлари ҳам эътиборга олинди.
Болаларнинг таътилни мазмунли ўтказиши учун тадбирлар режаси ишлаб чиқилди. Унда музейлар, истироҳат боғлари, спорт объектларига саёҳат уюштириш кўзда тутилган. Шунингдек, танловлар ва спорт марафонлари дастури ҳам тайёрланди. Болалар кўп вақтини ашула айтиш, расм чизиш, рақс, тўқиш, дизайн, волейбол, баскетбол, стол тенниси тўгаракларида ўтказади.
«Камолот» ёшлар ижтимоий ҳаракати эскурсиялар ташкил этиш ва тўгаракларнинг самарали фаолият кўрсатишига кўмаклашади, Болалар спортини ривожлантириш жамғармаси эса зарур спорт инвентарларини тақдим этган. Оромгоҳда малакали шифокор ва тиббиёт ҳамширалари болалар саломатлигини назорат қилиб боради.
Мавсум давомида оромгоҳда турли маданий-маърифий тадбирлар, адабий кечалар, спорт мусобақалари ўтказиш кўзда тутилган. Республика ёш томошабинлар театри ва Республика қўғирчоқ театри ижодий жамоаларининг қизиқарли спектакл ва дастурлари уларга унутилмас қувонч бағишлайди.
Яқин кунларда ушбу оромгоҳлар ўз фаолиятини бошлайди.
Изоҳ (0)