2000-yildan buyon O‘zbekiston yalpi ichki mahsuloti energiya sig‘imi (mahsulot tayyorlash, xizmat ko‘rsatish bo‘yicha texnologik jarayonda energiya iste’mol qilish qiymati) ikki marta kamaydi va yanada kamayish salohiyatiga ega. Bu haqda “Energiya samaradorligi — iqtisodiyotni yanada rivojlantirishning asosiy omili” konferensiyasida aytib o‘tildi, deb yozadi “Gazeta.uz”.
“O‘zbekiston YaIM energiya sig‘imi 2000-yildan buyon 0,98 neft ekvivalentidagi tonnadan 0,48 gacha pasaydi”, — deyiladi tadbirni Jahon banki bilan hamkorlikda tashkil etgan Iqtisodiyot vazirligi ma’ruzasida.
O‘zbekistonda ayni paytda sanoatning energiya samaradorligini Jahon bankining 125 million dollarlik kreditlari hisobidan oshirish dasturi amalga oshirilmoqda. Bu sohaga kiritiladigan investitsiyalar energetika tizimlari, ishlab chiqarish uskunalarini almashtirish yoki modernizatsiya qilish, isitish uchun ikkilamchi issiqlikdan foydalanish, qayta ishlanadigan energiya manbalarini qamrab oladi.
Rasmiy ma’lumotlarga ko‘ra, O‘zbekistonda 2030-yil oxirigacha energiya manbalariga bo‘lgan talab 2013-yilga nisbatan 5,5 foizga o‘sadi va YaIMning yiliga 8—8,5 foizga o‘sishi sur’ati saqlanib qolgan holda 43,5 million neft ekvivalentidagi tonnani tashkil etadi.
Izoh (0)