Qatar fond bozori FIFA prezidenti Yozef Blatterning iste’foga chiqish haqidagi bayonotidan so‘ng 3-iyun kuni so‘nggi bir yarim oydagi eng past ko‘rsatkichni qayd etdi. Bu haqda “Vedomosti” xabar bermoqda.
Bloomberg’ning qayd etishicha, bunga Qatarning futbol bo‘yicha 2022-yilgi jahon chempionatidan mahrum bo‘lishi haqidagi xavotirlar sabab bo‘lgan. Qatar ushbu musobaqani tashkil etish uchun 200 milliard dollar miqdorida investitsiya kiritayotgan edi.
Financial Times’ning yozishicha, rasmiy Qatar bu kabi xavotirlar haqidagi mish-mishlarni rad etdi. Qatar futbol assotsiatsiyasi rahbari Hamad bin Xalifa bin Ahmad at-Tanining so‘zlariga ko‘ra, Qatar FIFA yollagan amerikalik mustaqil tergovchi Maykl Garsiya o‘tkazgan surishtiruv natijalariga “hech qanday aybi yo‘qligi isbotlangan”.
Qatar FIFA tomonidan 2022-yilgi jahon chempionati mezboni etib tanlanishi ko‘plab bahs-munozaralarga sabab bo‘lgandi: Qatarning boy futbol tarixi yo‘q, mundial final bosqichi an’anaviy ravishda o‘tkaziladigan iyun-iyul oylarida Qatarda kuchli jazirama bo‘lishi JCh-2022ni boshqa faslga ko‘chirishga sabab bo‘ladi.
Iqlim sharoitlaridan kelib chiqib FIFA chempionatni nisbatan salqin mavsumga ko‘chirishga qaror qildi, biroq bu holat jahonning yetakchi chempionatlari taqvimini to‘liq qayta ko‘rib chiqishga sabab bo‘ladi.
Izoh (0)