Қатар фонд бозори ФИФА президенти Йозеф Блаттернинг истеъфога чиқиш ҳақидаги баёнотидан сўнг 3 июнь куни сўнгги бир ярим ойдаги энг паст кўрсаткични қайд этди. Бу ҳақда «Ведомости» хабар бермоқда.
Bloomberg’нинг қайд этишича, бунга Қатарнинг футбол бўйича 2022 йилги жаҳон чемпионатидан маҳрум бўлиши ҳақидаги хавотирлар сабаб бўлган. Қатар ушбу мусобақани ташкил этиш учун 200 миллиард доллар миқдорида инвестиция киритаётган эди.
Financial Times’нинг ёзишича, расмий Қатар бу каби хавотирлар ҳақидаги миш-мишларни рад этди. Қатар футбол ассоциацияси раҳбари Ҳамад бин Халифа бин Аҳмад ат-Танининг сўзларига кўра, Қатар ФИФА ёллаган америкалик мустақил терговчи Майкл Гарсия ўтказган суриштирув натижаларига «ҳеч қандай айби йўқлиги исботланган».
Қатар ФИФА томонидан 2022 йилги жаҳон чемпионати мезбони этиб танланиши кўплаб баҳс-мунозараларга сабаб бўлганди: Қатарнинг бой футбол тарихи йўқ, мундиал финал босқичи анъанавий равишда ўтказиладиган июнь июль ойларида Қатарда кучли жазирама бўлиши ЖЧ-2022ни бошқа фаслга кўчиришга сабаб бўлади.
Иқлим шароитларидан келиб чиқиб ФИФА чемпионатни нисбатан салқин мавсумга кўчиришга қарор қилди, бироқ бу ҳолат жаҳоннинг етакчи чемпионатлари тақвимини тўлиқ қайта кўриб чиқишга сабаб бўлади.
Изоҳ (0)