Angliyaning “Nyukasl” klubi yarim himoyachisi Xonas Gutyerres klub bilan xayrlashayotganidan telefon qo‘ng‘irog‘i orqali xabar topgan. Bu haqda ESPN xabar qilmoqda.
Klub bosh murabbiyi Jon Karver oldiniga jamoa faxriysi Rayan Teylorga qo‘ng‘iroq qilib, uni ishdan bo‘shatgan. Keyin esa Teylordan telefon go‘shagini uni yaqinida turgan Gutyerresga berishni so‘ragan.
“Klub menga yangi shartnoma taklif qilmasligini taxmin qilgandim. Men ko‘p narsani ko‘rganman, lekin klub vakili shaxsan menga yoki hech bo‘lmasa agentimga qo‘ng‘iroq qilib, bu xabarni aytishi men uchun muhim edi”, — dedi Gutyerres.
Angliya chempionatining so‘nggi turidagi “Vest Xem” bilan o‘yinda 31 yoshli argentinalik futbolchi gol kiritdi va yana bir golga assistentlik qildi. “Hakkalar”ning 2:0 hisobidagi g‘alabasi evaziga “Nyukasl” Premyer-ligadagi o‘rnini saqlab qolgandi.
Gutyerres 2014-yilning sentabrida saraton bilan kasallanganini ma’lum qilgan. 2014-yilning dekabr oyida esa u davolanib maydonga qaytgan. Argentinalik futbolchi “Nyukasl” safida 2008-yildan beri to‘p surib kelayotgandi.
Izoh (0)