Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази томонидан Самарқандда «Ашула ва рақс ансамбллари» республика кўрик-танлови ғолибларини тақдирлаш маросими бўлиб ўтди. Бу ҳақда Марказ матбуот хизмати хабар бермоқда.
«Ашула ва рақс ансамбллари» республика кўрик-танловида 128 та ҳаваскорлик халқ ашула ва рақс ансамблари ҳамда 8 та болалар намунали жамоалари халқ оғзаки ижодининг энг қадимий ва гўзал намуналарини, асрий куй-қўшиқларни ижро этди.
Танлов якунларига кўра, Самарқанд вилоятининг «Афросиёб» ашула ва рақс халқ ансамблига биринчи ўрин, Қорақалпоғистон Республикаси «Шуғла» ашула ва рақс халқ ансамбли, Навоий вилояти Кармана тумани «Гули» ашула ва рақс халқ ансамблларига иккинчи ўрин насиб этди.
Учинчи ўринга Қашқадарё вилояти Яккабоғ тумани «Дил навоси» ашула ва рақс халқ ансамбли, Андижон вилояти Андижон шаҳри «Гулруҳ» ашула ва рақс халқ ансамбли, Хоразм вилояти Хива тумани «Хива нақшлари» ашула ва рақс халқ ансамбллари лойиқ деб топилди.
Тадбир сўнгида танлов ғолиб ва совриндорлари иштирокида гала-концерт бўлиб ўтди. Фаол иштирокчиларга фахрий ёрлиқ ва эсдалик совғалари топширилди.
Изоҳ (0)