Janubiy Koreyaning Kyongido viloyati ma’muriyati Koronavirus tomonidan kelib chiqqan Yaqin Sharq respirator sindromi (YaSHRS-KoV, MERS) tarqalishi oldini olish maqsadida Pxyontxek shahrida 40ta bolalar bog‘chasi va maktablarni yopdi. Bu haqda “TASS” xabar bermoqda.
“MERS bilan kasallanganlar joylashtirilgan kasalxona yaqinidagi 18ta bolalar bog‘chasi va 22ta boshlang‘ich maktab faoliyati bir haftaga to‘xtatildi”, - deyiladi viloyat ta’lim boshqarmasi tomonidan tarqatilgan axborotda. Boshqarma ma’lumotlariga ko‘ra, kasallik mazkur ta’lim muassasalariga sizib kirishi mumkin.
Ma’lumot uchun, Janubiy Koreyada MERS bilan kasallanganlar soni 25 nafarga yetdi, bundan tashqari, mamlakatda ikki kishi mazkur koronavirus natijasida vafot etgan. Bundan tashqari, butun mamlakat bo‘ylab 682 kishi karantinga joylashtirilgan.
Avvalroq Janubiy Koreya bosh vaziri vazifasini bajaruvchi Chxve Gyon Xvan hukumatning seshanba kuni bo‘lib o‘tgan favqulodda yig‘ilishida aholi orasida vahima ko‘tarilmasligi uchun barcha zarur choralarni ko‘rishga chaqirandi.
Ayni vaqtda, bosh vazirning qayd etishicha, mamlakat aholisi “tibbiyot mas’ullarining kasallikka qarshi harakatlari samarasiz bo‘ldi deb hisoblayapti”. “Xalqimiz xavotirini yo‘qotish uchun barcha imkoniyatlardan foydalanishimiz shart”, – dedi bosh vazir.
Yangi koronavirusli infeksiya ilk bor 2012-yili Saudiya Arabistonida qayd etilgandi. Virus kamida to‘qqiz mamlakatni – Saudiya Arabistoni, Qatar, Iordaniya, Fransiya, Germaniya, Buyuk Britaniya, BAA, Tunis va Italiyani qamrab olgan.
Virus gripp kabi havo-tomchi yo‘li orqali yuqadi. Hozirgi vaqtda MERS-CoV’ga qarshi vaksinalar mavjud emas.
Izoh (0)