Rossiya 2015 yilning may oyida neft qazib olish hajmi bo‘yicha, Saudiya Arabistonini ortda qoldirib, jahonda birinchi o‘ringa chiqdi. RBC.ru xabariga ko‘ra, Rossiya may oyida 45,288 million tonna neft qazib olgan, o‘rtacha kunlik qazib olish hajmi esa 10,708 million barrelga teng bo‘lgan.
Neft qazib olish ko‘rsatkichlari bo‘yicha OPЕK mamlakatlari orasida eng kattasi hisoblangan Saudiya Arabistoni may oyida kuniga o‘rtacha 10,25 million barrel neft qazib olgan. Bu apreldagi ko‘rsatkichdan qariyb bir foizga kam.
Avvalroq, neft qazib olish bo‘yicha jahonda uchinchi mamlakat hisoblangan AQSHda sutkasiga 9,6 million barrel “qora oltin” qazib olinayotgani, bu so‘nggi yillardagi eng yuqori ko‘rsatkich ekanligi haqida xabar berilgandi.
2014 yil oxirida neft narxi keskin tushib ketganiga qaramay, Rossiya neft qazib olish hajmini susaytirayotgani yo‘q. Qayd etish joiz, 2014 yil davomida bir barrel neft narxi 110 dollardan 40 dollargacha tushib ketdi, bu esa rublning keskin qadrsizlanishiga sabab bo‘ldi.
Izoh (0)