Angliyaning Vustershir grafligidagi uncha katta bo‘lmagan Wyche Keep Country House mehmonxonasi egasi Jersi orolida ro‘yxatdan o‘tgan New World Oil and Gas (NWOG) neft kompaniyasining qariyb yarim aksiyalarini tasodifan qo‘lga kiritdi. Bu haqda Slon.ru xabar bermoqda.
May oyi boshida Kristofer Uilyams onasi Yudit nomidan (mehmonxonaga aynan u egalik qiladi) NWOG’ning 342 million dona aksiyasini 1,5 million funt-sterling (2,4 million dollar)ga sotib olish uchun brokerga talabnoma topshirgan edi. Kristofer bu mablag‘ evaziga kompaniyaning 10 foizini qo‘lga kiritishni maqsad qilgandi, biroq bu vaqtda NWOG’ning aksiyalari birjaga chiqishi yakuniga yetmagani sabab, u kompaniyaning 48,7 foizi egasiga aylanib qoldi.
Nisbatan aniq hisob-kitoblar natijasida Yudit Uilyamsning NWOG’dagi ulushi taxminan 36 foizgacha kamaydi. Biroq, Britaniya qonunchiligiga muvofiq, 30 foizdan ortiq ulushga ega aksiyador boshqa aksiyadorlarga o‘z ulushlarini sotish taklifi bilan chiqishi kerak, agar shunday qilmasa, Britaniya hukumati uni NWOG’ning qolgan aksiyalarini sotib olishga majbur qilishi mumkin. Hozircha bu borada yakuniy qaror qabul qilinganicha yo‘q.
NWOG yuzaga kelgan muammoni hal qilish uchun aksiyadorlarning favqulodda majlisini o‘tkazishga qaror qilgan. Taxminlarga ko‘ra, kompaniya asosiy aksiyador – Uilyamsning ulushini kamaytirish uchun boshqa aksiyadorlarga aksiyalarni bozor narxidan arzon qiymatda sotib olishga ruxsat berishi mumkin.
Daily Mail’ning yozishicha, NWOG bilan yuzaga kelgan holat yuzasidan 76 yoshli Uilyams izoh berishni xohlamagan. Biroq, o‘g‘lining tan olishicha, u tomonidan amalga oshirilgan xarid “oilada katta tushkunlikka sabab bo‘lgan”.
New World Oil and Gas Beliz va Daniyadagi uchta neft va gaz loyihalari operatori hisoblanadi. Kompaniya aksiyalarining bahosi bir yil avvalgiga nisbatan qariyb 60 foizga arzon. Uilyams NWOG qimmatli qog‘ozlarini sotib olgan vaqtda ularning narxi 300 foizga o‘sdi, biroq so‘ng yana tushib ketdi.
Izoh (0)