Misrning sobiq prezidenti Husni Muborak sud uning bo‘yniga qo‘ygan 125 million misr funti (taxminan 16,5 million dollar) miqdoridagi jarimani to‘laganidan so‘ng ozodlikka chiqarilishi mumkin. Bu haqda, “Al-Masri al-Yaum” nashriga asoslanib, “TASS” xabar bermoqda.
Nashr manbalarining ma’lum qilishicha, Muborak so‘nggi bir necha oydan beri Ma’diy harbiy gospitalida qolmoqda va qonun talablariga ko‘ra qamoqxonaga xos ko‘k rangli libosni yechayotgani yo‘q.
“Jarimani to‘liq to‘lab bo‘lmaganicha u hibsda saqlanadi va ozodlikka chiqarilmaydi. Ta’kidlash kerak, jarimani to‘lash jarayoni boshlangan”, - dedi jazoni ijro etish boshqarmasidagi manbalar.
Bundan tashqari, kasalxonaning qoidalaridan kelib chiqqan holda, mamlakatning sobiq birinchi xonimi Syuzan Muborak erining ozodlikka chiqishini kutgan holda u bilan birga kasalxonada qolmoqda.
Prezident qarorgohlarini ta’mirlash uchun ajratilgan davlat mablag‘larini noqonuniy o‘zlashtirish va korrupsiya ishi bo‘yicha 9-may kuni bo‘lib o‘tgan takroriy sud mahkamasida Muborak va uning ikki o‘g‘li – Alya va Gamal uch yilga ozodlikdan mahrum etildi va 21 million misr funti (qariyb 3 million dollar) miqdorida jarimaga tortildi.
Shuningdek, sud ularga 125 million misr funti (taxminan 16,5 million dollar) miqdoridag mablag‘ni davlatga qaytarish majburiyatini yukladi – tergov ma’lumotlariga ko‘ra, ular umumiy hisobda shuncha mablag‘ni talon-taroj qilishgan.
13-may kuni Misr IIVning jazoni ijro etish muassasalari bo‘yicha yordamchisi Hasan as-Soxagiy Bosh prokuratura Muborakning 2011-yil bahoridan beri hibsda o‘tkazgan vaqtini ozodlikdan mahrum etish hukmiga tenglashtirgan.
14-may kuni prokuratura vakillari ushbu axborotni tasdiqlashdi va “Muborak sud tomonidan belgilangan ozodlikdan mahrum etish jazosini amalda o‘tab bo‘lganini va ortiq mahbus hisoblanmasligini” ma’lum qilishdi.
“Biroq, jarima to‘langanidan keyingina jazoni ijro etish jarayoni to‘liq bajarilgan hisoblanadi”, - deya qayd etishdi Bosh prokuratura vakillari.
Izoh (0)