AQSH Kongressining Vakillar palatasi Milliy xavfsizlik agentligi (MXA)ning telefon qo‘ng‘iroqlari bilan bog‘liq meta-ma’lumotlarni ommaviy to‘plash imkoniyatini cheklovchi qonun loyihasini ma’qulladi. Bu haqda Meduza.io xabar bermoqda.
“AQSH erkinligi to‘g‘risidagi qonun” loyihasi AQSH Kongressi yuqori palatasida tinglovdan o‘tishi kerak. The Washington Post’ning yozishicha, ushbu hujjatning senat tomonidan qabul qilinishi istiqboli aniq-tiniq emas.
Nashrning qayd etishicha, maxsus xizmatlarning qonuniy asoslarini keskin qayta shakllantirishga ko‘plab senatorlar qarshi chiqishmoqda.
Qonun loyihasida qayd etilishicha, MXA qo‘ng‘iroqlar haqidagi ma’lumotlarni faqat sud qarori bilan olishi mumkin, telekommunikatsiya kompaniyalariga esa maxsus xizmatlarning bunday so‘rovlari haqida ommaga ma’lum qilish huquqi beriladi.
MXA amerikaliklarning telefon qo‘ng‘iroqlari haqidagi meta-ma’lumotlar (abonentlarning raqami, so‘zlashuvning sanasi va davomyligi)ni to‘plash uchun maxsus dastur ishlab chiqqanini 2013 yilda AQSH maxsus xizmatlarining sobiq xodimi Edvard Snouden ma’lum qilgandi. Bunday axborotlarni to‘plash uchun MXAga sud qarori zarur bo‘lmagan.
Izoh (0)