Англиянинг Вустершир графлигидаги унча катта бўлмаган Wyche Keep Country House меҳмонхонаси эгаси Жерси оролида рўйхатдан ўтган New World Oil and Gas (NWOG) нефть компаниясининг қарийб ярим акцияларини тасодифан қўлга киритди. Бу ҳақда Slon.ru хабар бермоқда.
Май ойи бошида Кристофер Уильямс онаси Юдит номидан (меҳмонхонага айнан у эгалик қилади) NWOG’нинг 342 миллион дона акциясини 1,5 миллион фунт-стерлинг (2,4 миллион доллар)га сотиб олиш учун брокерга талабнома топширган эди. Кристофер бу маблағ эвазига компаниянинг 10 фоизини қўлга киритишни мақсад қилганди, бироқ бу вақтда NWOG’нинг акциялари биржага чиқиши якунига етмагани сабаб, у компаниянинг 48,7 фоизи эгасига айланиб қолди.
Нисбатан аниқ ҳисоб-китоблар натижасида Юдит Уильямснинг NWOG’даги улуши тахминан 36 фоизгача камайди. Бироқ, Британия қонунчилигига мувофиқ, 30 фоиздан ортиқ улушга эга акциядор бошқа акциядорларга ўз улушларини сотиш таклифи билан чиқиши керак, агар шундай қилмаса, Британия ҳукумати уни NWOG’нинг қолган акцияларини сотиб олишга мажбур қилиши мумкин. Ҳозирча бу борада якуний қарор қабул қилинганича йўқ.
NWOG юзага келган муаммони ҳал қилиш учун акциядорларнинг фавқулодда мажлисини ўтказишга қарор қилган. Тахминларга кўра, компания асосий акциядор – Уильямснинг улушини камайтириш учун бошқа акциядорларга акцияларни бозор нархидан арзон қийматда сотиб олишга рухсат бериши мумкин.
Daily Mail’нинг ёзишича, NWOG билан юзага келган ҳолат юзасидан 76 ёшли Уильямс изоҳ беришни хоҳламаган. Бироқ, ўғлининг тан олишича, у томонидан амалга оширилган харид «оилада катта тушкунликка сабаб бўлган».
New World Oil and Gas Белиз ва Даниядаги учта нефть ва газ лойиҳалари оператори ҳисобланади. Компания акцияларининг баҳоси бир йил аввалгига нисбатан қарийб 60 фоизга арзон. Уильямс NWOG қимматли қоғозларини сотиб олган вақтда уларнинг нархи 300 фоизга ўсди, бироқ сўнг яна тушиб кетди.
Изоҳ (0)