So‘nggi bir yil davomida, 2014-yilning aprelidan beri AQSHdagi asalarichilik koloniyalarining 40 foizi qirilib ketdi. Bu haqda CBS News xabar bermoqda. Eng yomon ko‘rsatkichlar Oklaxoma shtatida qayd etilgan bo‘lsa (63,4 foiz), nisbatan eng yaxshi ko‘rsatkich (13,9 foiz) Gavayi orollarida kuzatilgan.
Bir guruh mutaxassislarning fikricha, asalari koloniyalarining qirilib ketishiga arilar o‘z inlarini tark etib, noma’lum yo‘nalishda uchib ketishlarini ko‘rsatmoqda. Boshqa bir guruh esa bunda Varroa turiga mansub zararkunanda kapalarni ayblamoqda – ular hasharotlar orasida juda tez ko‘payadi va aksariyat holatlarda fermerlar ularga qarshi kurash uchun yetarlicha e’tibor qaratishga ulgurmaydi.
Boshqa ekspertlar esa arilarning ommaviy qirilishida boshoqli ekinlar, meva va sabzavotlarni zararkunanda hasharotlardan himoya qilish maqsadida chiqariladigan pestitsidlar – neonikotinoidlarni ishlab chiqaruvchilarni ayblab chiqishgandi. Qayd etishlaricha, ushbu to‘qimalar arilarning asab tolalarini mahv etib, ularni ochlikdan o‘lishga mahkum etadi.
Nima bo‘lgan taqdirda ham, AQSHda arilar nima sababdan qirilib ketayotganini hozircha hech kim jo‘yali tushuntirib bera olmayapti. Olimlarning qayd etishicha, mamlakatda asalarichilik birinchi galda o‘simliklarni changlantirish jihatidan muhim. Turli hisob-kitoblarga ko‘ra, arilar AQSHdagi qishloq xo‘jaligi mahsulotlarining chorak qismini changlantiradi. AQSHdagi bu boradagi xizmatlar bozori 10-15 milliard dollarga teng. O‘simliklarni changlantirish bilan shug‘ullanuvchi kompaniyalar o‘z xizmatlari narxlarini oshirishga ulgurishdi.
Izoh (0)