BMT bosh kotibi Pokistondagi teraktni qoralab, tashkilotchilarni odil sudga jalb etishga chaqirdi

BMT bosh kotibi Pan Gi Mun 13-may, chorshanba kuni Pokistonning Karachi shahridagi teraktni qoraladi va mamlakat hukumatini javobgarlarni odillik bilan sud qilish uchun “barcha zarur choralarni ko‘rish”ga chaqirdi. Bu haqda “TASS” xabar bermoqda.

Bosh kotibning rasmiy vakili Stefan Dyujarrik so‘zlariga ko‘ra, Pan Gi Mun shuningdek, Pokiston hukumatini “mamlakatdagi diniy ozchilik guruhlarni samarali himoya qilishga qaratilgan tezkor tadbirlarni qabul qilish”ga da’vat etadi.

“Pokiston, xalqaro hamjamiyatning mas’ul a’zosi sifatida, barcha fuqarolari, jumladan ozchiliklar vakillari himoyasi bo‘yicha o‘z majburiyatlarini bajarishi kerak”, — dedi Dyujarrik.

Eslatib o‘tamiz, Pokistonning Karachi shahrida avtobus o‘qqa tutilishi natijasida, so‘nggi ma’lumotlarga ko‘ra, 45 kishi halok bo‘ldi.

Hujum Safura Got tumanida sodir bo‘ldi. Noma’lum jangarilar ismoiliylarning “Al Azhar Trast” xayriya tashkiloti avtobusiga qarata o‘t ochdi.

Keyinroq ushbu terakt uchun javobgarlikni ikkita terrorchilik guruhi — IShID va “Jandalla” o‘z bo‘yniga oldi.