KXDR mudofaa vaziri Xyon Yon Chxolning qatl etilishi Pxenyandagi g‘alayonlar haqidagi tasdiqlanmagan axborot bilan bir vaqtda ma’lum bo‘ldi. RBC.ru’ning The Telegraph’ga asoslanib xabar berishicha, g‘alayon haqidagi axborot Kim Chen Inning kutilmaganda Moskvadagi G‘alaba paradiga borish fikridan qaytishiga sabab bo‘lgan bo‘lishi mumkin.
“Kim Chen In Moskvaga safarini juda kech bekor qildi va, shunday ehtimol borki, KXDR yetakchisi o‘zi xorijda bo‘lgan vaqtda harbiylar uni hokimiyatdan chetlatishga urinmoqchi ekanliklaridan xabardor bo‘lib qolgan”, - dedi Yaponiyadagi Vaseda universiteti professori Toshimitsu Shigemura.
Nashrning yozishicha, bir yil avval mudofaa vaziri etib tayinlangan Xyon Yon Chxol “yosh diktatorning fikrlariga ochiqchasiga qarshi chiqqan” degan taxminlar ham bor.
Shigemuraning fikricha, vazirning qatl etilishidan maqsad jamiyatga, eng avvalo, harbiylarga Kim Chen In tuzumiga qarshi chiqqanlarning ahvoli qanday bo‘lishi haqida xabar berish va namoyish etishdir.
Avvalroq, Janubiy Koreya razvedkasi ma’lumotlariga asoslanib, Xyon Yon Chxol zenit uskunasiga qo‘yilgan holda 30-aprel kuni otib tashlangani haqida xabar berilgan edi. U davlatga xiyonatda ayblangan edi. Qayd etishlaricha, vazir KXDR yetakchisi ishtirokidagi majlis vaqtida uxlab qolgani uchun qatl etilgan.
30-aprel kuni Kim Chen In Moskvadagi G‘alabaga paradiga kelmasligi ma’lum bo‘lgandi. Rossiya prezidenti Vladimir Putinning matbuot kotibi Dmitriy Peskov Kim Chen In bu qarorni KXDRning ichki ishlari sabab qabul qilganini ma’lum qilgandi.
Izoh (0)