Сўнгги бир йил давомида, 2014 йилнинг апрелидан бери АҚШдаги асаларичилик колонияларининг 40 фоизи қирилиб кетди. Бу ҳақда CBS News хабар бермоқда. Энг ёмон кўрсаткичлар Оклахома штатида қайд этилган бўлса (63,4 фоиз), нисбатан энг яхши кўрсаткич (13,9 фоиз) Гавайи оролларида кузатилган.
Бир гуруҳ мутахассисларнинг фикрича, асалари колонияларининг қирилиб кетишига арилар ўз инларини тарк этиб, номаълум йўналишда учиб кетишларини кўрсатмоқда. Бошқа бир гуруҳ эса бунда Варроа турига мансуб зараркунанда капаларни айбламоқда – улар ҳашаротлар орасида жуда тез кўпаяди ва аксарият ҳолатларда фермерлар уларга қарши кураш учун етарлича эътибор қаратишга улгурмайди.
Бошқа экспертлар эса ариларнинг оммавий қирилишида бошоқли экинлар, мева ва сабзавотларни зараркунанда ҳашаротлардан ҳимоя қилиш мақсадида чиқариладиган пестицидлар – неоникотиноидларни ишлаб чиқарувчиларни айблаб чиқишганди. Қайд этишларича, ушбу тўқималар ариларнинг асаб толаларини маҳв этиб, уларни очликдан ўлишга маҳкум этади.
Нима бўлган тақдирда ҳам, АҚШда арилар нима сабабдан қирилиб кетаётганини ҳозирча ҳеч ким жўяли тушунтириб бера олмаяпти. Олимларнинг қайд этишича, мамлакатда асаларичилик биринчи галда ўсимликларни чанглантириш жиҳатидан муҳим. Турли ҳисоб-китобларга кўра, арилар АҚШдаги қишлоқ хўжалиги маҳсулотларининг чорак қисмини чанглантиради. АҚШдаги бу борадаги хизматлар бозори 10-15 миллиард долларга тенг. Ўсимликларни чанглантириш билан шуғулланувчи компаниялар ўз хизматлари нархларини оширишга улгуришди.
Изоҳ (0)