Eron prezidenti Hasan Ruhoniy Saudiya Arabistonining Yamandagi harbiy kampaniyasini katta strategik xato deb atadi. U bunday bayonot bilan 9-may, shanba kuni Eron Qizil Yarim oy jamiyatining “Yerdagi hayot va tinchlik uchun g‘amxo‘rlik” anjumanida chiqish qildi, deb yozadi “TASS”.
“Bu qashshoq mamlakatga rivojlanish uchun yordam berish o‘rniga, Saudiya Arabistoni kambag‘allashib qolgan Yaman xalqini bombardimon qilmoqda”, — deya qo‘shib qo‘ydi Ruhoniy.
Shu bilan birga, Eron prezidenti Yamanda yuzaga kelgan halokatli gumanitar vaziyat “butun dunyo uchun tarixiy sinov bo‘lgani”ni aytdi. Ruhoniy Eron bundan keyin ham Yamanga gumanitar yordam yuborish uchun intilishda davom etishini qo‘shimcha qildi.
Yaman hukumati va xusiylar o‘rtasidagi nizolar 2014-yilning avgustida boshlangandi. Joriy yilning yanvar oyida qo‘zg‘olonchilar mamlakat poytaxti Sanani to‘liq qo‘lga oldi. Yaman prezidenti Abdu Rabbo Mansur Hodiy oldiniga Adanga qochib o‘tdi, 25-mart kuni xusiylar bu shaharga ham kirganlaridan so‘ng u mamlakatni tark etdi. Bungacha u Fors ko‘rgazi davlatlariga murojaat qilib, ularni vaziyatga aralashishga chaqirdi.
Saudiya Arabistoni boshchiligidagi koalitsiya 26-martdan 21-aprelga qadar “Jasorat bo‘roni” operatsiyasini o‘tkazdi. Endi “Umidning tiklanishi” yangi operatsiyasi boshlandi.
Izoh (0)