Эрон президенти Ҳасан Руҳоний Саудия Арабистонининг Ямандаги ҳарбий кампаниясини катта стратегик хато деб атади. У бундай баёнот билан 9 май, шанба куни Эрон Қизил Ярим ой жамиятининг «Ердаги ҳаёт ва тинчлик учун ғамхўрлик» анжуманида чиқиш қилди, деб ёзади ТАСС.
«Бу қашшоқ мамлакатга ривожланиш учун ёрдам бериш ўрнига, Саудия Арабистони камбағаллашиб қолган Яман халқини бомбардимон қилмоқда», — дея қўшиб қўйди Руҳоний.
Шу билан бирга, Эрон президенти Яманда юзага келган ҳалокатли гуманитар вазият «бутун дунё учун тарихий синов бўлгани»ни айтди. Руҳоний Эрон бундан кейин ҳам Яманга гуманитар ёрдам юбориш учун интилишда давом этишини қўшимча қилди.
Яман ҳукумати ва хусийлар ўртасидаги низолар 2014 йилнинг августида бошланганди. Жорий йилнинг январь ойида қўзғолончилар мамлакат пойтахти Санани тўлиқ қўлга олди. Яман президенти Абду Раббо Мансур Ҳодий олдинига Аданга қочиб ўтди, 25 март куни хусийлар бу шаҳарга ҳам кирганларидан сўнг у мамлакатни тарк этди. Бунгача у Форс кўргази давлатларига мурожаат қилиб, уларни вазиятга аралашишга чақирди.
Саудия Арабистони бошчилигидаги коалиция 26 мартдан 21 апрелга қадар «Жасорат бўрони» операциясини ўтказди. Энди «Умиднинг тикланиши» янги операцияси бошланди.
Изоҳ (0)