Hindistonda maochilarning qurollangan guruhi 500ga yaqin kishini garovga oldi. RBC.ru’ning xabar berishicha, garovga olinganlar mamlakat bosh vaziri Narendra Modi bilan uchrashuvga ketayotgan bo‘lishgan.
Hodisa Hindistonnnig markaziy qismidagi Chxattisgarh shtati Sukma tumanidagi Marenga qishlog‘ida ro‘y bergan. Dastlabki ma’lumotlarga ko‘ra, qishloq aholisi Dantevadadagi mamlakat bosh vaziri Narendra Modi bilan bo‘ladigan uchrashuvga ketayotgan bo‘lgan.
India TV telekanalining qayd etishicha, hukumat boshlig‘i kelishi arafasida Dantevada “qal’aga aylantirilgan”. Maochi isyonchilarga qarshi kurash maqsadida tuzilgan CoBRA (Commando Batallion for Resolute Action) batalyonining 200 nafar jangchisidan tashqari uchrashuv bo‘ladigan tumanga milliy xavfsizlik xizmati va harbiylashtirilgan bo‘linmalarning 15 mingga yaqin xodimi kiritilgan.
Hukumat amaldorlarining ma’lum qilishicha, Narendra Modi uchrashuv chog‘ida okrugdagi yirik metallurgiya zavodi qurilishi va yirik temiryo‘l tarmog‘i qurilishining ikkinchi bosqichi boshlanishini e’lon qiladi. Bundan tashqari, bosh vazir kam ta’minlangan oilalarning farzandlari uchun mo‘ljallangan ta’lim shaharchasiga tashrif buyurishni ham rejalashtirgan edi.
NDTV telekanali ma’lumotiga ko‘ra, maochilar Marenga aholisini Modi bilan uchrashuvga bormaslikka ko‘ndirishga urinishgan. O‘tgan juma kuni ular daraxtni qo‘porib, qishloqqa olib boruvchi yo‘lni to‘sib qo‘yishgandi, yo‘lga hukumatga qarshi shiorlar, Narendra Modi va Raman Singhning tulumlari osib qo‘yilgan.
Mahalliy amaldorlarning telekanalga ma’lum qilishlaricha, maochilar qo‘shni ko‘prik qurilishida band bo‘lgan bir guruh marengalik ishchilarni ham garovga olishgan. Oradan ko‘p o‘tmay jangarilar ishchilarni ozod qilish bo‘yicha muzokara o‘tkazgani kelgan fuqarolarni ham qo‘lga olishgan.
Hindiston sharqidagi G‘arbiy Bengaliya shtatidagi maochilar isyoni 1960-yillarning oxirida boshlangan bo‘lib, ular Hindistonda kommunistik tartib o‘rnatilishi, shuningdek, qabilalarning huquqlari kengaytirilishi uchun va qishloqdagi qashshoqlikka qarshi kurash olib borishadi. Vaqti-vaqti bilan maochilar odamlarni garovga olishadi, politsiyachilar va davlat amaldorlariga hujum qilishadi. Xususan, 2014-yil oxirida Sukma okrugida maochilar tomonidan kamida 13 nafar politsiyachi o‘ldirilgan edi.
Izoh (0)