O‘zbekiston Prezidentining 2010-yil 21-dekabrdagi “2011-2015-yillarda infratuzilmani, transport va kommunikatsiya qurilishini rivojlantirishni jadallashtirish to‘g‘risida”gi qarori ijrosi doirasida qurilayotgan xalqaro ahamiyatga molik “G‘uzor – Buxoro – Nukus – Beyneu” avtomobil yo‘lining 652 kilometri Qoraqalpog‘iston hududidan o‘tadi. Bu haqda O‘zA xabar bermoqda.
Ushbu yirik bunyodkorlik ishlari doirasida xalqaro yo‘lning 765-kilometrida, ya’ni “Nukus – Chimboy – Taxtako‘pir” yo‘li bilan kesishgan joyda zamonaviy ko‘prik bunyod etildi. 2013-yilning dekabrida boshlangan qurilish ishlari Qoraqalpog‘iston Respublikasi ko‘prik xo‘jaligini saqlashga ixtisoslashtirilgan ta’mirlash-foydalanish korxonasi tomonidan amalga oshirildi.
“Xalqaro andozalarga to‘la javob beradigan ushbu inshoot qurilishida qirqdan ziyod ishchi-muhandis 20 ga yaqin zamonaviy texnika va mexanizmlardan unumli foydalanib, ishni sifatli yakunladi. Shu kunlarda qurilishning ikkinchi bosqichi, ya’ni ko‘prik atrofini obodonlashtirish, tungi yoritkichlarni o‘rnatish ishlari nihoyasiga yetkazilmoqda. Inshoot Vatanimiz mustaqilligining 24 yillik bayramiga o‘ziga xos sovg‘a bo‘ladi”, – deydi korxona rahbari Rustam O‘razimbetov.
Xalqaro ahamiyatga molik “G‘uzor – Buxoro – Nukus – Beyneu” avtomobil yo‘lining Qoraqalpog‘iston hududidan o‘tgan qismida 1 motel, 3 avtomobillarga yoqilg‘i quyish shoxobchasi, 4 avtomobillarga gaz to‘ldirish kompressor stansiyasi, 6 avariya-chaqiruv va tibbiy hamda texnik yordam punkti, 2 avtomobillarning qisqa to‘xtash joyi bunyod etilmoqda.
Izoh (0)