Namangan shahrida yashovchi aka-uka “tadbirkor”lar o‘z yurtdoshlarining sog‘lig‘idan ko‘ra cho‘ntaklarini qappaytirishni o‘yladilar, deb yozadi “Huquq” gazetasi.
Yozning jaziramasida salqin ichimliklar savdosi bilan shug‘ullanishni maqsad qilgan aka-uka muqaddam sudlangan qo‘shnilarini o‘zlariga sherik qilib oldi.
Ular Namangan shahridagi “Chorsu” bozoridan gazli suv sotish uskunasi xarid qildi-da, aka-ukalarning xonadoniga o‘rnatdi. Qo‘lbola ichimlik tayyorlash maqsadida uchovlon shahardagi kafelarni aylanib, Pepsi yorlig‘i yopishtirilgan bo‘sh yelim idishlarni yig‘ishtirishga kirishdi. Mo‘ljaldagi idishlar yig‘ilgach, gazli suv, shakar va sirop qo‘shib, bir qarashda haqiqiy Pepsi’dan farq qilmaydigan ichimlik tayyorlashdi.
Ularning bozori tezda gurkirab ketdi, biroq bu xatti-harakatlari ortidan kimlarningdir sog‘lig‘iga putur yetayotganini o‘ylashmasdi.
Har qanday qing‘ir ish ham bir kun fosh bo‘ladi. Tanish do‘konchiga 12 dona 0,5 va 6 dona 1,5 litrli Pepsi yorlig‘i yopishtirilgan va qalbakilashtirilgan ichimlikni 70 ming so‘mga sotayotgan ustamonlarning faoliyatiga departamentning Namangan viloyati boshqarmasi xodimlari tomonidan chek qo‘yildi.
Tergov jarayoni yakunlangach, ular sud hukmi bilan tegishli jazolarini oldi.
Izoh (0)