Ўзбекистон Президентининг 2010 йил 21 декабрдаги «2011-2015 йилларда инфратузилмани, транспорт ва коммуникация қурилишини ривожлантиришни жадаллаштириш тўғрисида»ги қарори ижроси доирасида қурилаётган халқаро аҳамиятга молик «Ғузор – Бухоро – Нукус – Бейнеу» автомобиль йўлининг 652 километри Қорақалпоғистон ҳудудидан ўтади. Бу ҳақда ЎзА хабар бермоқда.
Ушбу йирик бунёдкорлик ишлари доирасида халқаро йўлнинг 765-километрида, яъни «Нукус – Чимбой – Тахтакўпир» йўли билан кесишган жойда замонавий кўприк бунёд этилди. 2013 йилнинг декабрида бошланган қурилиш ишлари Қорақалпоғистон Республикаси кўприк хўжалигини сақлашга ихтисослаштирилган таъмирлаш-фойдаланиш корхонаси томонидан амалга оширилди.
«Халқаро андозаларга тўла жавоб берадиган ушбу иншоот қурилишида қирқдан зиёд ишчи-муҳандис 20 га яқин замонавий техника ва механизмлардан унумли фойдаланиб, ишни сифатли якунлади. Шу кунларда қурилишнинг иккинчи босқичи, яъни кўприк атрофини ободонлаштириш, тунги ёриткичларни ўрнатиш ишлари ниҳоясига етказилмоқда. Иншоот Ватанимиз мустақиллигининг 24 йиллик байрамига ўзига хос совға бўлади», – дейди корхона раҳбари Рустам Ўразимбетов.
Халқаро аҳамиятга молик «Ғузор – Бухоро – Нукус – Бейнеу» автомобиль йўлининг Қорақалпоғистон ҳудудидан ўтган қисмида 1 мотел, 3 автомобилларга ёқилғи қуйиш шохобчаси, 4 автомобилларга газ тўлдириш компрессор станцияси, 6 авария-чақирув ва тиббий ҳамда техник ёрдам пункти, 2 автомобилларнинг қисқа тўхташ жойи бунёд этилмоқда.
Изоҳ (0)