AQSHning Michigan shtatida joylashgan Flint shahrida Gigglz laqabli cho‘chqa shahar merligiga nomzod sifatida ko‘rsatildi. CBS Detroit xabariga ko‘ra, cho‘chqa mahalliy advokat Maykl Yuingning sa’y-harakatlari bilan lavozimga da’vogarlik qilish huquqini qo‘lga kiritgan.
“Nazarimda, qotilligi uchun sudlangan shaxsning shahar meri etib saylanishi Flint haqida yetarli darajada yomon signal sifatida talqin etilishi mumkin”, - dedi Yuing. Uning ta’kidlashicha, Gigglz aqlli va muloyim jonivor, qolgan ikki nomzod haqida esa bunday deb bo‘lmaydi.
Merlikka nomzod Gigglzning Facebook’dagi sahifasi ochilganidan keyingi bir necha kun ichida 1,5 mingdan ortiq obunachini to‘plashga muvaffaq bo‘ldi. Xabar berishlaricha, shahar merligiga saylovlar 2015-yil 3-noyabrida bo‘lib o‘tadi.
Bu jonivorlarning Amerika shaharlari hokimligiga da’vogarlik qilishi bilan bog‘liq ilk hodisa emas. 2014-yil noyabrida chixuaxua zotiga oid Frida laqabli it shahar jonivorlarni saqlash xizmatini qo‘llab-quvvatlash kampaniyasi doirasida San-Fransisko meri etib “tayinlangan” edi.
1997-yili Alyaskadagi uncha katta bo‘lmagan Talkitna shahrida Stabbs laqabli mushuk mutlaq ko‘pchilikning ovozi bilan shahar meri etib saylangan va hozirgi qadar shaharga rahbarlik qilib keladi. 2013-yili unga suiqasd uyushtirilgan, bir necha haftani veterinariya klinikasida o‘tkazganidan so‘ng, mushuk uyga qaytgan.
Izoh (0)