Buyuk Britaniyaning O‘zbekistondagi elchisi Jord Edgar Toshkentdagi Muqobil energetika klubida Birlashgan Qirollikda xususiy sektor tomonidan amalga oshirilayotgan “yashil” loyihalar haqida ma’ruza qildi. Bu haqda UzDaily xabar bermoqda.
Buyuk Britaniya elchisining ma’lum qilishicha, jahonda amaliyotida birinchi bo‘lib aynan Britaniyada “Yashil” investitsion bank faoliyati yo‘lga qo‘yilgan bo‘lib, ustav kapitali 3,8 milliard funt-sterlingga teng bo‘lgan bu moliya muassasasi homiylik qilayotgan tadbirlar orasida Angliya shimoli-sharqida Nissan Leaf elektromobillarini ishlab chiqarish loyihasi ham bor.
Elchi Edgarning qayd etishicha, Britaniyaning Sentec kompaniyasi “aqlli” elektr tarmoqlari va “idrokli” hisoblagichlarni yetkazib berish bo‘yicha jahonda yetakchi hisoblanadi. Shuningdek, Britaniyaning Atkins dizayn va muhandislik konsalting kompaniyasi ekologik jihatdan nisbatan bezarar va energiya samaradorligi yuqori bo‘lgan jahonga mashhur binolar qurilishida ishtirok etgani bilan dunyoga tanilgan.
Elchining taqdimotidan so‘ng bo‘lib o‘tgan qizg‘in muhokamalar jarayonida “yashil” texnologiyalar sohasida O‘zbekiston va Britaniya ishbilarmonlari o‘rtasida hamkorlikni rivojlantirish borasida turli g‘oyalar o‘rtaga tashlandi.
Izoh (0)