O‘zbekiston vakillari Buyuk Britaniyadagi umumiy parlament saylovlarini kuzatib boruvchi missiyada ishtirok etadi. Bu haqda, Buyuk Britaniyaning Toshkentdagi elchixonasi matbuot xizmatiga asoslanib, “Gazeta.uz” xabar bermoqda.
Londondan 27 kilometr uzoqlikda joylashgan Uotford shahar saylov okrugidagi ovoz berish jarayonini Oliy Majlis Qonunchilik palatasi deputati, Xalqaro ishlar va parlamentlararo aloqalar qo‘mitasi a’zosi Akmal Umirzoqov, shuningdek, Markaziy saylov komissiyasi a’zosi, O‘zbekiston Milliy universiteti prorektori, doktor Shuhrat Sirojiddinov kuzatib boradi.
Bir qator mamlakatlarning vakillaridan iborat kuzatuvchilar missiyasi Millatlar hamdo‘stligi Parlament assotsiatsiyasi (MHPA)ning Britaniya bo‘limi tomonidan 2-8-may kunlari tashkil etilgan. O‘zbekiston vakillarining tashrifini tashkil etishga Buyuk Britaniyaning Toshkentdagi elchixonasi moliyaviy ko‘mak ko‘rsatgan.
Missiya ishtirokchilari tayyorlov mashg‘ulotlaridan o‘tishgan va 7-may kuni ovoz berish jarayonini kuzatib borishadi. Ular parlament a’zoligiga ko‘rsatilgan nomzodlar, fuqarolik jamiyati, mahalliy ma’muriyat va saylov komissiyasi vakillari bilan uchrashishadi. Xususan, ular saylov jarayonining barcha bosqichlarida, jumladan, saylov uchastkalarining ochilishi, ovoz berishning borishi, uchastkalarning yopilishi va ovozlarni hisoblashni kuzatib borishda ham ishtirok etishadi.
Izoh (0)