Toshkentdagi Aloqa tarixi muzeyida 6-may kuni “O‘zbekistonning yetti mo‘jizasi” loyihasi taqdimoti bo‘lib o‘tdi. Bu haqda Blog.index.uz xabar bermoqda.
Tadbir tashkilotchilaridan biri – UZINFOCOM markazi direktori vazifasini bajaruvchi G‘ayratxo‘ja Saydaliyev aksiyaning O‘zbekiston va har bir o‘zbekistonlik uchun, mamlakatning turistik maftunkorligi va xalqaro nufuzi uchun ahamiyati haqida so‘zladi.
Aksiya tashabbuskori, ZiyoNET markazi xodimi Zumrad Shojalilova esa tadbirning texnik tomoni, aksiyaning har bir bosqichi, nomzodlar qanday ilgari surilishi, qanday bo‘limlari bo‘lishi haqida ma’lumot berdi, hududlar va O‘zbekiston bo‘yicha g‘oliblar qanday aniqlanishini tushuntirdi.
Taqdimotda qatnashgan jurnalistlar va blogerlardan ham bir qator qiziqarli takliflar tushdi. Xususan, Boris Babayev Madaniyat va sport ishlari vazirligidan tarixiy obyektlari haqidagi ma’lumotlarni olib, har bir nomzod obyekt haqida rasmiy axborot berishni taklif qildi.
Madaniyat va sport ishlari vazirligining sobiq rahbari Tursunali Qo‘ziyev esa joriy aksiyada asosiy e’tiborni arxitektura va tabiat yodgorliklariga qaratib, nominatsiyalar ko‘lamini nisbatan cheklashni, qadriyatlar, amaliy san’at va nomoddiy merosni boshqa shu kabi aksiyalar uchun saqlab qo‘yishni tavsiya qildi.
Bloger Baxtiyor Nasimov esa O‘zbekistonning kulinariya shedevrlarini ham mo‘jizalar qatoriga kiritish taklifini ilgari surdi. Rahimjon Sultonov ham uning fikrini qo‘llab-quvvatlab, butun dunyo palovni aynan O‘zbekiston bilan bog‘lashini aytdi.
Tabiatni muhofaza qilish davlat qo‘mitasi vakili Viktoriya Rizayeva esa tabiat mo‘jizalariga ko‘proq e’tibor qaratishga chaqirdi, chunki, uning fikricha, ular arxitektura yodgorliklari kabi muhofazaga muhtojdir.
Izoh (0)