Буюк Британиянинг Ўзбекистондаги элчиси Жорд Эдгар Тошкентдаги Муқобил энергетика клубида Бирлашган Қиролликда хусусий сектор томонидан амалга оширилаётган «яшил» лойиҳалар ҳақида маъруза қилди. Бу ҳақда UzDaily хабар бермоқда.
Буюк Британия элчисининг маълум қилишича, жаҳонда амалиётида биринчи бўлиб айнан Британияда «Яшил» инвестицион банк фаолияти йўлга қўйилган бўлиб, устав капитали 3,8 миллиард фунт-стерлингга тенг бўлган бу молия муассасаси ҳомийлик қилаётган тадбирлар орасида Англия шимоли-шарқида Nissan Leaf электромобилларини ишлаб чиқариш лойиҳаси ҳам бор.
Элчи Эдгарнинг қайд этишича, Британиянинг Sentec компанияси «ақлли» электр тармоқлари ва «идрокли» ҳисоблагичларни етказиб бериш бўйича жаҳонда етакчи ҳисобланади. Шунингдек, Британиянинг Atkins дизайн ва муҳандислик консалтинг компанияси экологик жиҳатдан нисбатан безарар ва энергия самарадорлиги юқори бўлган жаҳонга машҳур бинолар қурилишида иштирок этгани билан дунёга танилган.
Элчининг тақдимотидан сўнг бўлиб ўтган қизғин муҳокамалар жараёнида «яшил» технологиялар соҳасида Ўзбекистон ва Британия ишбилармонлари ўртасида ҳамкорликни ривожлантириш борасида турли ғоялар ўртага ташланди.
Изоҳ (0)