Kembrij gersoginyasi Keyt va uning turmush o‘rtog‘i shahzoda Uilyamning yangi tug‘ilgan qizi sharafiga Buyuk Britaniyada esdalik tangalari chiqariladi, deb xabar beradi “TASS”.
3-may kuni Britaniya qirollik tangalar saroyi 5 funtlik tangalarning suratini namoyish qildi. Tangalar 2-may kuni dunyoga kelgan malika sharafiga chiqariladi.
Qirolicha Yelizaveta II, malikaning ota-onasi va moliya vaziri tomonidan ma’qullangan tangaga aylanma tarzda “Ikkinchi farzandning tug‘ilishi sharafiga” yozuvi bo‘ladi. Uning markazida yangi mehmonning ota-onasi unvonlari yoziladi — “Kembrij gersog va gersoginyasi”. Bulardan tashqari chaqaloq dunyoga kelgan 2015-yil ham ko‘rsatiladi.
Jami 500 ta oltin va 9,5 mingta kumush tanga zarb qilinadi. Yana Yelizaveta II’ning evarasi bilan bir kunda tug‘ilgan chaqaloqlarning ota-onasi uchun bir penslik kumush tangalar ham bosib chiqariladi.
2013-yilda shahzoda Jorj tug‘ilganda va u bir yoshga to‘lganida ham bayramona tangalar chiqarilgandi.
Hozirgacha chaqaloqqa qanday ism qo‘yilishi noma’lum. Avvalroq Shahzoda Uilyam va Keyt Middlton qiz ko‘rsa, uni malika Diana sharafiga nomlamoqchi ekanligi xabar berilgan edi.
Izoh (0)