Кембриж герцогиняси Кейт ва унинг турмуш ўртоғи шаҳзода Уильямнинг янги туғилган қизи шарафига Буюк Британияда эсдалик тангалари чиқарилади, деб хабар беради ТАСС.
3 май куни Британия қироллик тангалар саройи 5 фунтлик тангаларнинг суратини намойиш қилди. Тангалар 2 май куни дунёга келган малика шарафига чиқарилади.
Қиролича Елизавета II, маликанинг ота-онаси ва молия вазири томонидан маъқулланган тангага айланма тарзда «Иккинчи фарзанднинг туғилиши шарафига» ёзуви бўлади. Унинг марказида янги меҳмоннинг ота-онаси унвонлари ёзилади — «Кембриж герцог ва герцогиняси». Булардан ташқари чақалоқ дунёга келган 2015 йил ҳам кўрсатилади.
Жами 500 та олтин ва 9,5 мингта кумуш танга зарб қилинади. Яна Елизавета II’нинг эвараси билан бир кунда туғилган чақалоқларнинг ота-онаси учун бир пенслик кумуш тангалар ҳам босиб чиқарилади.
2013 йилда шаҳзода Жорж туғилганда ва у бир ёшга тўлганида ҳам байрамона тангалар чиқарилганди.
Ҳозиргача чақалоққа қандай исм қўйилиши номаълум. Аввалроқ Шаҳзода Уильям ва Кейт Миддлтон қиз кўрса, уни малика Диана шарафига номламоқчи эканлиги хабар берилган эди.
Изоҳ (0)