29-aprel kuni O‘zbekiston milliy domeni tashkil etilganiga 20 yil to‘ldi. “Gazeta.uz”ning ma’lum qilishicha, 1995-yilning aynan shu kuni Janubiy Kaliforniya (AQSH) Informatika institutining universiteti UZ milliy domenini tashkil etish haqidagi so‘rovni ma’qullagan edi.
2001-yilga qadar UZ domenida istalgan kishi bepul nom olishi mumkin edi. Shundan so‘ng domenga ma’murlik qilish huquqini O‘zbekistonda Tomas kompaniyasi nomidan ish olib boruvchi Germaniyaning Euracom Equipment GmBH kompaniyasi qo‘lga kiritgan.
2002-yil dekabrida Ixtisoslashgan manzillar va raqamlar uchun internet korporatsiyasi (ICANN) va Internetdagi manzil kengliklari assotsiatsiyasi (IANA) qaroriga asosan UZ domeni ustidan boshqaruv huquqi UZINFOCOM markaziga o‘tkazildi, markaz hozirgi kunga qadar UZ domeni ma’muri hisoblanadi.
2005-yil kuzida UZ domenini ro‘yxatga oluvchilar soni bittadan oltitagacha ko‘paydi, natijada domen narxi 40 dollardan (bungacha domen narxi 89 dollarga ham teng bo‘lgan) 25 dollargacha arzonlashdi. Hozirgi kunda domen narxi o‘rtacha 10-15 dollarni tashkil etmoqda.
O‘zbekistonda UZ domenining oltita rasmiy registratori bor, bular – Tomas, Amaliy Aloqalar Biznesi, Sarkor Telecom, Billur Com, Arsenal-D va New Line Solutions kompaniyalaridir. Shuningdek, Qoraqalpog‘iston Respublikasi Vazirlar Kengashi va sakkiz viloyat hokimliklari huzuridagi kompyuterlashtirish markazlari ham domenlarni ro‘yxatga olish xizmatini ko‘rsatadi.
Hozirgi vaqtda UZ domenida ro‘yxatga olingan domenlar soni 21 mingga yetgan, joriy yil boshidan beri domenlar soni 9,4 foizga o‘sdi. Domenlarning 44 foiziga jismoniy shaxslar, 56 foiziga esa yuridik shaxslar egalik qiladi. UZ domenlarining aksariyat qismi – 86 foizi O‘zbekiston rezidentlari tomonidan ro‘yxatdan o‘tkazilgan.
Izoh (0)