Jahon yovvoyi tabiat jamg‘armasi (WWF) jahon okeani resurslarini 24,2 trillion dollarga baholadi. Bu haqda “Korrespondent.net” xabar bermoqda.
Jamg‘arma vakillarining ma’lum qilishlaricha, bu ancha qisqartirilgan ko‘rsatkich, chunki ko‘plab tabiiy resurslarni pul ekvivalentiga o‘tkazib bo‘lmaydi.
“Har yili jahon okeani insoniyatga “yetkazib berayotgan” mahsulot va xizmatlarning taxminiy bahosi 2,5 trillion dollarga teng. Agar bu raqamni jahon okeanining yalpi ichki mahsuloti sifatida qabul qiladigan bo‘lsak, u AQSH, Xitoy, Yaponiya, Germaniya, Fransiya va Buyuk Britaniyadan so‘ng yettinchi iqtisodiyot bo‘lardi”, - deyiladi jamg‘arma press-relizida.
Hozirgi vaqtda ifloslangani, haddan tashqari ko‘p baliq ovlanayotgani, ko‘plab baliq va jonivorlarning hayot makonlari buzilgani, shuningdek, marjonlarning skeletlari buzilib ketishiga sabab bo‘ladigan okean suvi harorati va kislotalilik darajasi oshishi natijasida okeanning salomatligi og‘ir ahvolda turibdi.
“Agar okean harorati hozirgi o‘sishda davom etsa, misol uchun, 2050-yilga borib marjon qoyalari butunlay yo‘qolib ketadi”, - deyiladi press-relizda.
Hozirgi vaqtda jahon baliq resurslarining 90 foizi yo qayta tiklanish imkoniyati chegarasida ovlanmoqda (61 foiz), yoki keragidan ortiq ovlanib bo‘lgan (29 foizi), deya qayd etmoqda WWF.
Avvalroq, yaqinda Avstraliyada sayyoraning o‘ziga xos ekotizimi – Katta marjon qoyalarni saqlab qolish bo‘yicha reja taqdim etilgan edi. Unga iqlim o‘zgarishi, kimyoviy chiqindilar va tuproq yeyilishi tahdid solmoqda. Tadqiqotchilarning ma’lumotlariga ko‘ra, marjon qoyalarning yarmi so‘nggi 30 yilda yo‘q bo‘lib ketdi.
Izoh (0)