Avstraliyalik mahbus qatldan bir kun avval qamoqxonada uylandi

Indoneziya qamoqxonasida o‘limga mahkum etilgan avstraliyalik Endryu Chan hukm ijro etilishidan bir kun oldin sevgan qiziga uylandi, deya xabar bermoqda Reuters.

Nikoh marosimida kelin-kuyovning  do‘st va qarindoshlari ishtirok etdi.

Juftlik Chan Balidagi qamoqxonada o‘tirgan vaqtida tanishgan. Qiz ruhoniy sifatida yigitni muntazam ravishda ko‘rib turgan.

Eslatib o‘tamiz, Endryu Chan va Muran Sukuraman 2005-yili boshqa yetti nafar avstraliyalik bilan birga Bali orolida hibsga olingan.

Indoneziya hukumati ma’lumotlariga ko‘ra, ushbu Avstraliya fuqarolari geroin giyohvandlik moddasini olib o‘tish va yetkazib berish bilan shug‘ullanishgan.

Sud qaroriga ko‘ra, Chan va Sukuraman o‘lim jazosiga, qolgan yetti nafar Avstraliya fuqarolari esa umrbod qamoq jazosiga hukm qilingan.

Avstraliya tomoni esa o‘z fuqarolariga nisbatan o‘lim jazosining ijro etilishiga mutlaqo qarshi chiqmoqda.