Uelsning Pembrukshir grafligida yashovchi muhandis aprel boshida old panjalaridan ayrilgan toshbaqaga g‘ildiraklar o‘rnatdi, deya xabar bermoqda BBC News. T xonim laqabli 90 yoshli jonivor kalamush hujumi tufayli oyoqlarini yo‘qotgan.
Kalamushlar toshbaqaga u qishki uyquda bo‘lgan vaqtida hujum qilgan. Jonivorning egasi bo‘lmish Jud Rayder ismli ayol uni davolatish uchun ming funt (1,5 ming dollar)ga yaqin mablag‘ sarflagan, biroq veterinarlar toshbaqaga yordam bera olmagan. Shundan so‘ng ayol mexanik muhandis bo‘lib ishlovchi 37 yoshli o‘g‘liga murojaat qilgan.
U toshbaqa tanasiga temir o‘qqa ulangan o‘yinchoq samolyot g‘ildiraklarini o‘rnatish uchun daraxt yelimidan foydalandi. “T xonim g‘ildiraklarni darhol tushunib oldi, lekin to‘xtashni o‘rganishi uchun biroz vaqt kerak bo‘ldi”, — dedi Rayder.
Izoh (0)