Sharqiy Qozog‘iston viloyatida istiqomat qiluvchi ayol Qozog‘iston prezidenti saylovi kuni tug‘ilgan o‘g‘liga Nursulton deb ism qo‘ydi. Bu haqda “RIA Novosti” xabar bermoqda.
Chaqaloqning onasi Elmira Serjanovaning so‘zlariga ko‘ra, u tug‘uruqxonadan turib saylovda qatnashgan – saylov komissiyasi a’zolari bu yerga ko‘chma savatni olib kelishgan.
“Men Nursulton Nazarboyevni haqli g‘alaba bilan tabriklayman. Men unga boshidan ishongandim. Farzandim hali homilaning ichida bo‘lgan vaqtidayoq men bilan birga mamlakatning munosib rahbari uchun ovoz berdi”, - dedi Serjanova.
Xabar berishlaricha, ota-ona o‘ylab o‘tirmay unga Nursulton deb ism qo‘ygan. Chaqaloq 4,2 kg vazn va 56 sm bo‘y bilan tug‘ilgan. Shifokorlarning so‘zlariga ko‘ra, chaqaloq va yosh ona o‘zini yaxshi his qilmoqda.
Eslatib o‘tamiz, 26 aprel, yakshanba kuni Qozog‘istonda navbatdan tashqari prezident saylovi bo‘lib o‘tdi. Unda amaldagi prezident Nursulton Nazarboyev 97,75 foiz ovoz bilan navbatdagi muddatga saylandi.
Izoh (0)