Bir yilda butun dunyo bo‘ylab 300 tonna oltin tashlab yuborildi

2014-yilda axlatxonalarga 41,8 million tonna “elektr axlatlar” — sovitgichlar, kir yuvish mashinalari, telefonlar va kompyuterlar tashlab yuborildi, deya xabar bermoqda Meduza.

Ushbu texnikaning ba’zi qismlarini ishlab chiqarishda oltin ishlatiladi, biroq u utilizatsiya qilinmasdan, axlatxonaga borib tushadi. BMT universiteti hisob-kitoblariga ko‘ra, shu tariqa aholi 300 tonna oltinni tashlab yuborgan, bu ushbu qimmatbaho metallning bir yilda qazib chiqariladigan miqdorining 11 foiziga tengdir.

“Elektr axlat” bo‘yicha yetakchilar Xitoy va AQSh hisoblanadi — bu davlatlar hissasiga jami hajmning uchdan bir qismi to‘g‘ri keladi. Shu bilan birga, axlat miqdori kishi boshiga hisoblanadigan bo‘lsa, birinchi o‘rinlarni Norvegiya, Shveysariya, Islandiya, Daniya va Buyuk Britaniya kabi Yevropa davlatlari egallaydi.

BMT ekspertlari ta’kidlashicha, “elektr axlat” hajmi doimiy ravishda oshib bormoqda va 2018-yilga kelib 50 million tonnagacha yetishi mumkin.