Rossiya tarkibidagi Boshqirdiston Respublikasining Kumertau shahridagi xonadonda yuz bergan yong‘inni o‘chirish vaqtida pichoqlab ketilgan besh kishining jasadi topildi. Bu haqda “Segodnya.ua” xabar bermoqda.
Mintaqaviy tergov qo‘mitasi ma’lumotlariga ko‘ra, qotillik juma kuni sodir etilgan. Turar-joy binosining xonadonlaridan birida yong‘in yuz bergan, olovni o‘chirish uchun kelgan qutqaruvchilar esa pichoqlangan besh kishining jasadini topishgan.
“Politsiya jabrlanuvchilarning shaxsini aniqlash ustida ishlamoqda. Taxminlarga ko‘ra, uyning egasi hisoblangan erkak va ayol, shuningdek, ikki qiz va bir yosh yigit halok bo‘lgan”, - deyiladi idora xabarida.
Mintaqaviy tergov qo‘mitasi vakili Svetlana Abramovaning so‘zlariga ko‘ra, har bir qurbonga kamida 30 marta pichoq sanchilgan.
“Jabrlanuvchilarning barchasi pichoq bilan yetkazilgan ko‘plab jarohatlar sabab halok bo‘lgan. Ekspertlar har bir jasadda 30tadan 40tagacha jarohat izlarini topishdi. Ba’zilarining tomog‘i hali tirikligida, boshqalariniki esa o‘lganidan so‘ng kesilgan”, - dedi Abramova.
Hozirgi vaqtda ushbu hodisa yuzasidan jinoyat ishi qo‘zg‘atilgan. Hodisa joyida Boshqirdiston Ichki ishlar vazirligi va tergov organlari xodimlari ish olib borishmoqda.
Izoh (0)