Eron o‘z fuqarolarining umra uchun Saudiya Arabistoniga borishlarini taqiqlab qo‘ydi

Eron hukumati Jiddada ro‘y bergan ikki eronlik ishtirokidagi mojaro sabab Saudiya Arabistoniga ziyoratchilarning parvozlarini vaqtincha to‘xtatdi. Bu haqda, Eron Madaniyat vazirligining ismi oshkor etilmagan vakiliga asoslanib, Associated Press xabar bermoqda.

Agentlik xabariga ko‘ra, ikki eronlik mart oyida Jidda aeroportida go‘yoki jinsiy zo‘ravonlik jabrlanuvchisiga aylangan. Vazirlik vakilining so‘zlariga ko‘ra, Saudiya Arabistoni hukumati ushbu holatni jiddiy o‘rganib chiqmagunicha, Eronda umra – kichik haj vaqtincha to‘xtatiladi. Eron vakili hodisa aybdorlari qat’iy jazolanishi shartligini ham ta’kidlagan.

Umra – musulmonlarning Makkadagi kichik haj ziyoratidir. Hajdan farqli ravishda, umra amallarini yilning istalgan oyida bajarish mumkin. Saudiya Arabistoni va Eron o‘rtasidagi munosabatlar esa Yamandagi qurolli nizo borasidagi qarashlarning turlicha ekanligi sabab so‘nggi oylarda keskinlashib bormoqda.