Braziliyaning yirik shaharlarida 12-aprel, yakshanba kuni ko‘p ming kishilik norozilik namoyishlari bo‘lib o‘tdi. Bu haqda CNN xabar bermoqda.
“Yo‘qolsin Dilma” va “O‘zgarishlar vaqti keldi” kabi shiorlarni ko‘tarib olgan namoyishchilar mamlakat prezidenti Dilma Russeffning iste’fosini talab qilib ko‘chalarga chiqishdi.
Namoyishlar ikki kundan beri davom etmoqda, ishtirokchilarning so‘zlariga ko‘ra, bu oxirgi norozilik emas. So‘nggi bor bu kabi namoyishlar mart oyi o‘rtalarida bo‘lib o‘tgandi: o‘shanda Russeffni iqtisodiy inqiroz va korrupsiya darajasini oshirib yuborganlikda ayblab chiqishgandi.
Norozilik namoyishlariga Petrobras neft korporatsiyasi atrofida yuzaga kelgan korrupsiya mojarosi sabab bo‘ldi – Dilma Russeff prezident bo‘lguniga qadar yetti yil davomida Petrobras’ga rahbarlik qilgan.
Ma’lum bo‘lishicha, kompaniyaning bir qator xodimlari imzolangan shartnomalardan 3 foiz miqdorida mukofot puli olib turishgan, keyinchalik esa bu pullardan siyosatchilar va amaldorlarni sotib olish uchun foydalanilgan.
Braziliya tarixida bungacha ham korrupsiya bilan mojaro ortidan e’lon qilingan impichment sabab muddatidan avval iste’foga chiqqan prezident bo‘lgan. 1990-yilda prezident etib saylangan Fernandu Afonsu Koloru di Meluga 1992-yili ishonchsizlik bildirilgan – shundan so‘ng u prezidentlikdan ketganidan keyingi sakkiz yil davomida ham siyosatga yaqinlashtirilmagan.
Izoh (0)