Эрон ҳукумати Жиддада рўй берган икки эронлик иштирокидаги можаро сабаб Саудия Арабистонига зиёратчиларнинг парвозларини вақтинча тўхтатди. Бу ҳақда, Эрон Маданият вазирлигининг исми ошкор этилмаган вакилига асосланиб, Associated Press хабар бермоқда.
Агентлик хабарига кўра, икки эронлик март ойида Жидда аэропортида гўёки жинсий зўравонлик жабрланувчисига айланган. Вазирлик вакилининг сўзларига кўра, Саудия Арабистони ҳукумати ушбу ҳолатни жиддий ўрганиб чиқмагунича, Эронда умра – кичик ҳаж вақтинча тўхтатилади. Эрон вакили ҳодиса айбдорлари қатъий жазоланиши шартлигини ҳам таъкидлаган.
Умра – мусулмонларнинг Маккадаги кичик ҳаж зиёратидир. Ҳаждан фарқли равишда, умра амалларини йилнинг исталган ойида бажариш мумкин. Саудия Арабистони ва Эрон ўртасидаги муносабатлар эса Ямандаги қуролли низо борасидаги қарашларнинг турлича эканлиги сабаб сўнгги ойларда кескинлашиб бормоқда.
Изоҳ (0)