Shveysariyada futbolchi hakamning yuziga to‘p tepgani uchun 50 yilga futboldan chetlatildi

Shveysariyaning “Portugal” klubi yarim himoyachisi 28 yoshli Rikardo Ferreyra 50 yilga diskvalifikatsiya qilindi, deya xabar bermoqda Sports.ru. Jazo muddati 2064-yil 5-iyunida tugaydi, o‘sha vaqtda Ferreyra 78 yoshda bo‘ladi.

To‘rtinchi Shveysariya ligasi doirasidagi “Portugal”—“Vorb” o‘yinida Ferreyra jamoasi 0:1 hisobida yutqazgach, o‘yin so‘ngida yarim himoyachi hakamning yuziga qarata to‘p tepgan. Arbitr o‘yinchiga qizil kartochka ko‘rsatib, maydonni tark etayotganida ham Ferreyra uni quvib yetib, haqoratlay boshlagan va boshiga butilkadan suv quyib yuborgan.

Shundan so‘ng Shveysariya futbol federatsiyasi o‘yinchini butun umrga futboldan chetlatishga qaror qildi. Biroq futbolchilarning jazolanish muddatini belgilovchi kompyuter dasturiga diskvalifikatsiyaning yakunlanish muddati ham kiritilishi zarur bo‘lgani tufayli 2064-yil tanlandi, bu vaqtda Ferreyra futbol jamoatchiligiga hech qanday xavf sola olmaydi.