Janubiy Koreyaning Incheon shahrida o‘tkazilayotgan ParaOsiyo o‘yinlarida o‘zbekistonlik sportchilar zafarli odimlashda davom etishmoqda, deb yozadi Milliy olimpiya qo‘mitasi.
Bugun yengil atletikaning 200 hamda 800 metr masofaga yugurish bo‘yicha o‘tkazilgan musobaqalarida O‘zbekiston sharafini himoya qilgan sportchilar yana 2 ta oltin, 1 ta kumush va 1 ta bronza medalini qo‘lga kiritdi.
200 metr masofaga yugurish musobaqasida marra chizig‘iga 23:10 soniyada yetib kelgan Faxriddin Hamroyev ParaOsiyo o‘yinlarining oltin medaliga sazovor bo‘ldi. Bu Faxriddinning mazkur ParaOsiyo o‘yinlaridagi ikkinchi oltin medalidir. Bunga qadar u 800 metr masofaga yugurish musobaqalarida ham Osiyoning eng kuchli sportchisi degan nomga sazovor bo‘lgan edi.
Xuddi shu masofaga yugurish bo‘yicha o‘tkazilgan musobaqada ishtirok etgan yana bir yurtdoshimiz Miran Saxadov 24:43 soniya natija ko‘rsatib, kumush medal sovrindori bo‘ldi.
Bugungi musobaqalarda delegatsiyamiz hisobiga ikkinchi oltin medalni 800 metr masofaga yugurish musobaqasida ishtirok etgan Ma’rufjon Murodillayev keltirdi. Belgilangan masofani 1:57.88 soniyada bosib o‘tgan hamyurtimiz, oltin medalni qo‘lga kiritish bilan birga, ParaOsiyo o‘yinlari rekordini ham yangilashga muvaffaq bo‘ldi.
Eslatib o‘tamiz, Ma’rufjon Murodillayev 20-oktabr kuni 1500 metr masofaga yugurish bo‘yicha bo‘lib o‘tgan musobaqada ham oltin medalni qo‘lga kiritish bilan birga, Osiyo rekordini ham yangilagan edi.
Ushbu masofaga yugurish musobaqasining final bosqichida ishtirok etgan yana bir yurtdoshimiz Sirojiddin Norov marra chizig‘ini 2:05.14 soniyada bosib o‘tdi va ParaOsiyo o‘yinlarining bronza medali sovrindori bo‘ldi.
Shu tariqa, yengil atletikachilarimiz tomonidan qo‘lga kiritilgan medallar soni 11 taga yetdi (6 ta oltin, 3 ta kumush, 2 ta bronza).
Shu o‘rinda ta’kidlash joizki ParaOsiyo — 2014 o‘yinlarida suzish musobaqalarida ishtirok etgan Kirill Pankov (4 ta) va Dmitriy Xorlin (3 ta) jami 7 ta oltin medalga sazovor bo‘lishgan bo‘lsa, dzyudo ustalarimiz jami 9 ta medalni (7 ta oltin, 1 ta kumush, 1 ta bronza) qo‘lga kiritdilar.
Ayni daqiqalarga kelib O‘zbekiston delegatsiyasi hisobida 20 ta oltin, 4 ta kumush, 3 ta bronza medali mavjud va hamyurtlarimiz umumjamoa hisobida 41 davlat orasida 5-o‘rinda borishyapti.
Izoh (0)