Ramzan Qodirov Grozniydagi portlashga aloqador kishilarni yo‘q qilishga va’da berdi

Checheniston rahbari Ramzan Qodirov Grozniydagi konsert zalida yuz bergan portlashda halok bo‘lgan politsiyachilarning qarindoshlariga va yaqinlariga hamdardlik izhor etdi, deya xabar bermoqda “RIA Novosti”.

“Portlashga aloqador bo‘lganlarning barchasini topib, yo‘q qilamiz”, — deya ta’kidladi u.

Qodirovning aytishicha, politsiya xodimlari “birinchi postdayoq bu shaytonni to‘xtatib, terakt oldini olgan”.

Grozniydagi portlash Shahar kuniga bag‘ishlangan konsert oldidan ro‘y berdi. Konsert zaliga kiraverishda politsiyachilar diqqatini tortgan shubhali yigit o‘z-o‘zini portlatib yubordi. U ikki oy avval uyidan chiqib, bedarak ketgan 19 yoshli mahalliy fuqaro bo‘lib chiqdi.

So‘nggi ma’lumotlarga ko‘ra, portlash natijasida besh politsiyachi qurbon bo‘lgan, yana 12 nafari jarohat olgan.