Checheniston poytaxti Grozniy shahrida terrorchilik harakatiga chek qo‘yish vaqtida to‘rt nafar politsiyachi halok bo‘ldi. Bu haqda Rossiya IIV matbuot xizmatiga tayanib, Interfax xabar bermoqda.
Ma’lum bo‘lishicha, 5—oktabr Grozniy shahri kuni munosabati bilan konsert o‘tkaziladigan zalga kiraverishda o‘rnatilgan metallni aniqlovchi detektor yonida o‘z xizmat vazifasini o‘tayotgan politsiya xodimlari shubhali yigitni payqab qolgan. Politsiyachilar uni tekshirib, shaxsini aniqlamoqchi bo‘lganida, yigit o‘zini portlatib yuborgan.
Portlash natijasida IIV BBning to‘rt nafar xodimi halok bo‘ldi, yana yetti nafari jarohat oldi. Konsertga kelgan kishilarning hech biri jabr ko‘rmagan.
Biroq ba’zi OAVlar halok bo‘lganlar sonini beshta deb e’lon qildi. “Kavkazskaya politika” nashri yozishicha, to‘rt politsiyachidan tashqari, bir nafar tinch fuqaro ham qurbon bo‘lgan.
IIV terrorchining shaxsi aniqlanganini ma’lum qildi. U Staropromislovskiy tumanida yashovchi, uyidan ikki oy avval chiqib ketib, bedarak ketgan fuqaro bo‘lib chiqdi.
Ayni paytda portlash ro‘y bergan joyda Federal xavfsizlik xizmati va politsiya xodimlari ish olib bormoqda.
Izoh (0)