Internet va ijtimoiy tarmoqlar imkoniyatlarini suiiste’mol qilish nojoizdir, zamonaviy ommaviy kommunikatsiya vositalarini rivojlantirish jarayonida barcha xalqlar manfaatlarini hisobga olish zarur. Bu haqda Eron prezidenti Hasan Ruhoniy “Rossiya 24” telekanaliga bergan intervyusida aytib o‘tdi, deb yozadi “RIA Novosti”.
Prezident, shuningdek bugungi dunyoda kommunikatsiyalar muhim rol o‘ynashi, shuning uchun barcha davlatlar hukumatlari fuqarolarga “muvofiq bo‘lgan imkoniyatlar”ni taqdim etishi zarurligini ta’kidladi. Biroq “ba’zi xalqlar rioya qiluvchi diniy e’tiqod masalalarida ham, axloq masalalarida ham ijtimoiy tarmoqlarni suiiste’mol qilish yaramaydi”, dedi Ruhoniy.
“Tarmoqda xalqni gij-gijlovchi yoki ushbu mamlakatlarni xavf ostiga qo‘yuvchi narsalarni yozish kerak emas. Mana shu yo‘ldan borish va barcha xalqlar manfaatlarini e’tiborga olish kerak”, — deya ta’kidladi u.
O‘zining o‘tgan yilgi saylovoldi kampaniyalaridayoq Ruhoniy OAVdagi senzurani zaiflashtirishga va’da bergan edi. Ekspertlar fikricha, aynan shu qadam uning saylovlardagi g‘alabasini ta’minlagan.
2009-yilda Eron rahbariyatiga qarshi norozilik avj olib ketgach, hukumat matbuot erkinligi va internetga ulanishni keskin chekladi. Facebook, Twitter, Youtube va boshqa saytlar mamlakatda taqiqlandi.
Izoh (0)