Ukraina prezidenti Pyotr Poroshenko Jitomirskaya viloyatidagi bronetank zavodiga tashrif buyurib, korxonaning ishlab chiqarish quvvati bilan tanishdi, deya xabar bermoqda Segodnya.ua.
U yerda prezident ishchilarni ishlab chiqarish hajmini oshirish uchun uch smenali ish grafigiga o‘tish imkoniyatini ko‘rib chiqishga chaqirdi.
Korxona xodimlari bilan suhbatlashar ekan, u ushbu zavodning mamlakat mudofaasida tutgan muhim o‘rnini qayd etdi.
Poroshenko Oliy Bosh qo‘mondon sifatida butun dunyoni Ukrainani qo‘llab-quvvatlashga safarbar etishga va’da berdi.
“Butun dunyo Ukraina suvereniteti, mustaqilligi, ozodligi va demokratiyasini himoya qilgan holda biz bilan yonma-yon turadi. Har qanday istilochi esa Ukrainaga hujum qilgani uchun xalqaro izolyatsiyada qoladi va buning tovonini to‘laydi”, — dedi prezident.
Izoh (0)